Бирлашган Араб Амирликларининг Ал-Айн шаҳрида шахмат бўйича шаҳарлар ўртасида ўтказилаётган жаҳон чемпионатида Ватанимиз шарафини ҳимоя қилаётган «Тошкент» шаҳри жамоаси чорак финалга йўлланма олди.
Аввал хабар қилганимиздек, мамлакатимиз шахмат усталари нимчорак финал баҳсида Қозоғистоннинг «Астана» жамоаси билан куч синашдилар. Қизғин кечган учрашувларда Алексей Барсов («Тошкент») Ануар Исмагамбетовни («Астана»), Сайдали Йўлдошев («Тошкент») эса Кирилл Кудериновни («Астана) мағлуб этишди. Марат Жумаев («Тошкент») Ринат Жумабаев («Астана») билан дурангга имзо чеккан бўлса, Андрей Квон («Тошкент») Павел Коcурга («Астана») имкониятни бой берди.
Шу тариқа ўтказилган 4 партия якунига кўра «Тошкент» шаҳри жамоаси 2,5:1,5 ҳисобида зафар қучиб, чорак финалда «Афина» (Греция) жамоаси билан баҳс юритадиган бўлди. Грециялик шахмат усталари нимчорак финалда «Лондон» (Буюк Британия) жамоасидан 3:1 ҳисобида устун келдилар.
Нимчорак финалнинг қолган учрашувларида, Россиянинг «Саратов» жамоаси Бангладешнинг «Дакка» жамоасини 3,5:0,5 ҳисобида, Голландиянинг «Хооговен» жамоаси АҚШнинг «Чикаго» жамоасини 3:1 ҳисобида, Озарбойжоннинг «Боку» жамоаси эса чемпионат ғолиблигига асосий даъвогар ҳисобланган Франциянинг «Париж» жамоасини 3,5:0,5 ҳисобида мағлуб этдилар.
«Лунд» (Швеcия) – «Рига» (Латвия), «Птуй» (Словения) – «Нови сад» (Сербия) ҳамда «Лъвов» (Украина) - "Wу Хи" (Хитой) жамоалари учрашуви дуранг натижа билан якун топди. Ушбу жуфтликларда чорак финалга йўлланма олган жамоалар тай-брек орқали маълум бўлади.
Биз эса «Тошкент» шаҳри жамоасига чорак финал баҳсида ҳам омад ва зафарлар тилаб қоламиз. Агарда шахматчиларимиз ушбу босқичдан ҳам муваффақиятли ўтишса, ярим финалда «Саратов» – «Хооговен» жуфтлиги ғолиби билан куч синашадилар.
Шавкат Жалилов
Маданият ва спорт ишлари вазирлиги матбуот хизмати
