Чемпионлар лигасидаги жорий мавсумнинг илк хет-триги «Порту» учун бразилиялик ҳужумчи Эванилсон Барбозага насиб этди.
Эванилсон «Антверпен»га қарши ўйинни захира ўриндиғида бошлади ва фақат шеригининг жароҳати туфайли майдонга эрта тушди. Биринчи бўлим охирида Венделл мушакларида оғриқ ҳис қилди ва 44-дақиқада унинг ўрнига учрашувнинг бош қаҳрамони пайдо бўлди.
Бразилиялик футболчи ҳисоб 0:1 пайти майдонга тушди ва иккинчи бўлимда ҳаммасини ўзгартирди. «Антверпен»даги ғалаба эвазига португалияликлар гуруҳда «Барселона»дан сўнг иккинчи ўринни эгаллади.
Эванилсон «Флуминенсе» тарбияланувчиси ҳисобланади. У 24 ёшда. Бразилиянинг Форталеза шаҳрида туғилган. «Флуминенсе»да у 2013 йилдан 2020 йилгача ўйнаган. Ўша пайтда Словакиянинг иккинчи дивизиони вакили «Саморин» клубида қисқа муддатли ижарани ҳам ўтаган - у ерда умуман бразилияликлар жуда кўп. Олтита ўйинда қаҳрамонимиз учта гол ва битта голли узатмани амалга оширган. 2019 йил декабрь ойида Эванилсон Бразилиянинг «Томбенсе» клуби билан дастлабки шартномани имзолади, аммо ижара асосида ўзининг «Флуминенсе» жамоасида ўйнашни давом эттирди. «Порту» бразилиялик учун деярли 9 миллион евро сарфлади - бу маблағнинг 30 фоизини ҳужумчининг биринчи клуби олган.
Эванилсон тезда Португалия грандининг асосий жамоасидан жой топди ва 2021 йилнинг декабрь ойида у «Бенфика»га қарши ажойиб ўйин ўтказди. 30 дақиқада у дублга эришди ва қизил карточка олди ва буларнинг барчаси биринчи бўлимда содир бўлди. Бир неча ҳафта ўтгач, у яна ажойиб ҳаракатларни бошлаб юборди ва ўзининг биринчи хет-тригини «Белененсес»га қарши сафарда амалга оширди. Январь ойи охирида эса у «Маритимо»га қарши ўйинда гол урди ва лигада ойнинг энг яхши голи учун мукофотни олди.
Эванилсон бу мавсумда тўпиғидан олган жароҳатини даволади ва эндигина ўйинларга қайтмоқда. Аммо бу ҳам аллақачон чиройли натижалар билан содир бўлди: олтита тўлиқ бўлмаган ўйинда олтита гол.
Қишда «Милан» Эванилсонга қизиқиш билдирди, деб ёзди A Bola. Ҳужумчининг товон пули 100 миллион еврони ташкил қилади. Ўшанда миланликлар 50 миллионга португал клубини кўндиришни кутишган, аммо улар «Порту» билан якунда келиша олмади.
Бундай тезкор хет-трикдан сўнг, унга бўлган даъвогарлар кўпроқ бўлиши аниқ ва нарх янада юқорироқ қилиб белгиланиши мумкин.
