«Hilton Tashkent City» меҳмонхонасида Ўзбекистон футбол ассоциацияси, ФИФА юридик бўлими, Россиянинг «SILA International Lawyers» халқаро юридик компанияси, Спорт Арбитраж Суди ҳамкорлигидаги «Ҳуқуқ ва Спорт» номли халқаро семинар бошланди.
Унда маърузачилар сифатида хорижнинг бир қатор таниқли спорт ҳуқуқшунослари, жумладан ФИФА экспертлари, «SILA International Lawyers» халқаро юридик компанияси вакиллари, Спорт Арбитраж Судининг арбитрлари, Россиянинг «Динамо» ҳамда «Зенит» футбол клубларининг юридик бўлимлари раҳбарлари иштирок этмоқда.
Тадбирни Ўзбекистон футбол ассоциациясининг биринчи вице-президенти Равшан Эрматов очиб берди:
«Спорт ҳуқуқшунослиги бўйича ўтказилаётган семинарни ташкил этишда кўмаклашган халқаро ташкилотлар ҳамда спикерларга ушбу ташаббусни қўллаб-қувватлагани учун миннатдорчилик билдираман. Марказий Осиёда юқори малакали футбол мутахассислари жуда кўп ва улар ўз профессионал даражасини ошириб боришни исташади. Ўйлайманки, ушбу семинар барча учун жуда фойдали бўлишига ва минтақамизда футбол ривожига ўз ҳиссасини қўшишига ишонамиз. Келажакда клубларимиз ҳуқуқшунослари шартномалар тузишда, халқаро ҳуқуқий ҳужжатлар расмийлаштиришда юқори стандартларга мос фаолият олиб боришига ёрдам беради», деди Равшан Эрматов.
Ўз навбатида, Осиё футболидаги янги талаб ва ташаббуслар ҳақида ОФК юридук қўмитаси аъзоси Ойбек Касимов тўхталиб ўтди. Семинарда ҳудудий ассоциациялар ҳамда профессионал клублар вакиллари иштирок этиб, керакли маълумотларга эга бўлишмоқда», – деди Ирматов.
