Микель Артетанинг мураббий сифатидаги даражасини унинг кашф этган футболчилари мисолида кўришингиз мумкин. 41 ёшли мутахассис ўзига берилган "хомашё"ни юқори даражага эга юлдузларга айлантира олди. Қуйида Артета "Арсенал"ида юқори даражага чиққан футболчилар ҳақида сўз боради.
Деклан Райс
Райс "Вест Хэм"да жамоа юраги эди. Айнан унинг ҳаракатлари билан болғачилар ўтган мавсумда Европа чемпионига айланди. Агарда "Арсенал" Райснинг сифатларини аниқ билмаганида, уни сотиб олмаган бўларди. 25 ёшли ярим ҳимоячи "тўпчилар" сафига эндигина ўтганига қарамай, аллақачон Артета жамоасида ўз ўйинини кейинги даражага кўтара олди.
"Кейинги тўрт ҳафтада мен футболчи сифатида яхшигина ўсдим. Бу жамоада мен футбол ҳақида ўзимга қоронғу бўлган кўплаб нараларни ўрганаяпман", – дейди Англия терма жамоаси аъзоси.
Мартин Эдегор
Микель Артета қураётган жамоанинг ўзакларидан бири бу Эдегордир. Норвегиялик ўз фаолиятида узоқ йиллик саргардонликлардан кейин, ваниҳоят ҳақиқий уйини топди дейиш мумкин. Эдегор олти йил "Реал" футболчиси сифатида Европани турли клубларида ўйнади. Аммо мадридликлар сафига кира олмади. "Арсенал"даги ижара муддати омадли бўлди ва Лондон клуби уни бутунлай сотиб олди. Негаки, Артета Эдегорда келажакни кўра олган. Ҳозир унинг жамоа учун аҳамияти беқиёсдир.
Вильям Салиба
"Арсенал" 2019 йилда ёш ҳимоячи сотиб олади. Салиба Лондон клубига ўтганидан кейин ўз имкониятини узоқ вақт кутиб, ижараларда юришига тўғри келди. Франция терма жамоаси аъзосининг "Сен-Этьен", "Ницца" ҳамда "Марсел"даги уч йили кўрсатдики, Артета ихтиёрида ажойиб футболчи бор. Шу сабабли ўтган мавсум Салиба зудлик билан жамоага қайтарилди ва асосий таркибга кирди. Ўтган ёзда Салиба "Арсенал" билан 2027 йилга қадар ўз шартномасини узайтирганди. Бу ишда Артетанинг хизматлари беқиёс.
Арон Рамздейл
Артета журналистларнинг Рамздейлни захирада қолдириш ҳақида берган саволига шундай жавоб берганди: "Бу савол менга берилмаслиги керак. Мен уни қандай сифатларга эга ва қўлидан нималар келишини яхши биламан. Айнан мен уни жамоага олиб келганман. У пайт бу ишим учун кўпчилик мени маломат қилганди". Артетанинг гапларида жон бор. 2021 йилда у таваккал қилиб, икки бор АПЛдан тушиб кетган Рамздейлни сотиб олади. Аммо бир мавсум ичида дарвозабон нималарга қодир эканини кўрсата олди. Ҳа, ҳозир у захирада ўтирибди. Аммо, аниқки, айнан Артета сабабли Рамздейлнинг даражаси бутунлай юқорилади.
Леандро Троссард
Бельгиялик вингер ҳали "Арсенал" сафида тўлақонли асосий таркиб вакилига айлана олмади. Аммо Троссард ажойиб харидлардан бири бўлди дейиш мумкин. У ўтган мавсумда асосан захирадан майдонга тушиб, 10 та голда бевосита иштирок этганди. Троссард Артета жамоасида ўртача ҳар 89 дақиқада бу ишни қилмоқда. "Брайтон" сафида Троссард бу борада 142 дақиқалик кўрсаткичга эга бўлган. Поттер даврида эса бу статистика 236 дақиқагача тушиб кетганди. Шундай экан, Артета 29 ёшли ҳужумчини яхшилай олган.
ИСМАТОВ Ж.
