БААнинг Ал-Айн шаҳрида шахмат бўйича шаҳарлараро жаҳон чемпионати ўз ниҳоясига етди. Кеча мусобақада финал ва 3-ўрин учун баҳслар бўлиб ўтди. Мусобақада юртимиз шарафини ҳимоя қилган Тошкент шаҳри жамоаси бронза медали учун Сербиянинг Нови Сад шаҳридан ташриф буюрган шахматчиларга қарши баҳс олиб боришди.

Тўртинчи доскада дона сурган Сайдали Йўлдошев рақибини мағлубиятга учратди ва жамоамизни олдинга олиб чиқди. Бироздан кейин биринчи доскада ўйнаган Марат Жумаев сербиялик шахматчининг ҳужумини бартараф эта олмади ва мағлубиятга учради.

Иккинчи ва учинчи доскаларда ўйнаган тошкентликлар — Андрей Квон ва Алексей Барсов ўйин давомида устунликка эга бўлишига қарамай, уларнинг рақиблари ўйинни дуранггача олиб бора олишди.

Тўқнашувда 2:2 ҳисоби қайд этилган бўлса-да, 3-ўрин сербияликларга берилди. Боиси, регламентга кўра биринчи досканинг қиймати бошқа доскаларникига нисбатан устун ҳисобланади ва айнан бу доскада Нови Сад шаҳри шахматчиси ғалабани қўлга киритди.

Финалда эса Голландиянинг Хоогевеен ва Озарбойжоннинг Боку шаҳри жамоалари баҳслашишди. Унда голландияликлар 2,5:1,5 ҳисобида ғалаба қозонишди.

Шу тариқа, 1-ўринни Хоогевеен (Голландия), 2-ўринни Боку (Озарбойжон), 3-ўринни Нови Сад (Сербия) ва 4-ўринни Тошкент шаҳри жамоалари эгаллашди.