"Брайтон" 33 ёшли дарвозабон Жейсон Стил билан ҳамкорликни узайтиришга эришди. Бу ҳақда инглиз клуби матбуот хизмати хабар берди. Дарвозабоннинг “чайқалар” билан янги шартномаси 2026 йилнинг июнь ойи охиригача амал қилади.
"Мен Жейсон учун жуда хурсандман. У ажойиб футболчи. Унинг муносабати, етакчилиги ва ҳар куни бу клубга олиб келадиган нарсалари бу ерда ўтказган фаолияти давомида бизнинг тараққиётимизнинг катта қисми бўлди", - деди "Брайтон" бош мураббийи Роберто Де Дзерби клуб матбуот хизматига.
Стил "Брайтон"да беш йил (2018 йилдан бери) ўйнамоқда. Жорий мавсумда дарвозабон барча турнирларда “чайқалар” сафида тўққизта ўйин ўтказиб, 17 та гол ўтказиб юборган. Футболчининг инглиз клуби билан аввалги шартномаси 2025 йилнинг июнь ойи охиригача амалда эди. Transfermarkt порталига кўра футболчининг тахминий нархи 4 миллион еврони ташкил қилади.
Олдинроқ "Брайтон" "Галатасарой" ҳимоячиси Саша Бога қизиқиш билдираётгани ҳақида хабарлар тарқалган эди.
