Англия Премьер-лигасининг 11-туридан ўрин олган “Лутон Таун” – “Ливерпуль” учрашуви якунига етди. Жамоалар 1:1 ҳисобида дуранг ўйнаб, ғолибни аниқлай олишмади.
Меҳмонларни мағлубиятдан 95-дақиқада захирадан майдонга тушган Луис Диас қутқариб қолди. Гол урганидан сўнг, 26 ёшли колумбиялик либосини кўтарди, унинг остида "Дадамни озод эт" ёзуви ёзилган футболка бор эди.
Эслатиб ўтамиз, вингер ватанида ота-онаси ўғирлаб кетилгани учун жамоасининг сўнгги учта ўйинини ўтказиб юборган эди. Бироз вақт ўтгач, футболчининг онасига уйга кетишга рухсат берилди, аммо отасининг тақдири ҳали ҳам номаълум.
Аввалроқ ОАВда Диаснинг отаси Миллий озодлик армияси гуруҳи томонидан ўғирлаб кетилгани ҳақида хабар берилганди.
