Эртага, 12 ноябрь куни Ўзбекистон кубоги финали доирасида "Насаф" – ОКМК учрашуви бўлиб ўтади. Ушбу баҳс олдидан олмалиқликлар бош мураббийи Миржалол Қосимов, шунингдек, вингер Хуршид Ғиёсов ва ҳужумчи Мартин Боакье ўз фикрларини билдириб ўтди.

Миржалол Қосимов: "Финал баҳси бир ўйиндан иборат бўлгани учун бундан фақат мухлислар ютади. Башорат қилишни ёқтирмайман, лекин ҳар доим бўлгани каби ғалабани мақсад қилиб майдонга чиқамиз. Негаки, ғолиб нафақат кубокни қўлга киритади, балки халқаро майдонга тўғридан тўғри йўлланмани ҳам нақд қилади.

Футбол шашка ёки шахмат эмас, жароҳатлар доим ёнма-ён юради. Ўзига хос йўқотишларимиз бор, лекин майдонда билдирмасликка ҳаракат қиламиз. Чемпионлар лигасидаги мағлубият учун мухлислардан узр сўрайман. Бу ҳам бир синов. Ички муҳитда муаммолар йўқ.

Ҳар икки жамоа бир-бирини яхши билади. Учрашув аввалида очиқ футбол кўрмасак керак. Чунки битта хато қимматга тушиши мумкин.

Финал учун ваъда қилинган мукофот пули ҳақидаги саволга шундай жавоб беришим мумкин. Агар мақсадимизга эришсак, мукофотнинг бир қисмини эҳсон қилишга келишиб олганмиз".

Мартин Боакье: "Бизни муҳим учрашув кутиб турибди. Бу мен учун Ўзбекистон кубоги доирасидаги дастлабки финал. Бундай ўйинларда қатнашиш ҳар бир футболчининг орзуси. Эртага майдонда ҳақиқий жанг бўлади. Ким гол уриши муҳим эмас. Асосийси, жамоа яхши ҳаракатланса ва ғалаба қозонсак бўлгани".

Хуршид Ғиёсов: "Финалга тайёргарлик жараёни яхши тарзда ўтди. Чемпионлар лигасидаги мағлубият тарихда қолди. Олдимизда кубокнинг ҳал қилувчи баҳси кутяпти. Бундай ўйинларда иштиёқ жуда кучли бўлади. Фақат ғалаба учун майдонга чиқамиз".