«Барселона» Испания чемпионатининг 13-тури доирасида ўз майдонида «Алавес»ни қабул қилиб, қийин ғалабага эришди.

Меҳмонлар 18-сонияда ҳисобни очишга муваффақ бўлишди: Саму Омородион яқин масофадан тўпни "Барса" дарвозасига жойлаб қўйди. "Алавес" танаффусга қадар яна 2 та гол уриш мумкин эди, аммо улар қулай имкониятлардан фойдалана олишмади.

Хави жамоаси иккинчи таймда ўз ўйинларини кучайтиришди ва ғалабани илиб кетишди. Баҳснинг 53-дақиқасида Жюль Кунде томонидан ҳаводан етказилган узатмани Роберт Левандовски бош билан рақиб дарвозасига буриб юборди.

Ўйиннинг 78-дақиқасида эса Ферран Торресга нисбатан ишлатилган қўполлик учун пенальти белгиланди. Левандовски масъулиятни ўз зиммасига олди ва 11 метрли жарима зарбасини голга айлантирди.

"Барселона" ушбу ғалаба туфайли ўз очколарини 30 тага етказиб олди ва 3-поғонани эгаллаб турибди.

Испания Ла лигаси, 13-тур
Барселона – Алавес 2:1 (0:1, 2:0)
Голлар: 0:1 – 1 Омородион, 1:1 – 53 Левандовски, 2:1 – 78, пенальти Левандовски.
Барселона – тер Стеген, Араухо, Мартинес, Кунде (Бальде, 70), Жоау Канселу, Гюндоган, Педри (Ромеу, 81), Лопес (Рафинья, 63), Жоау Феликс (Ферран Торрес, 70), Ямаль, Левандовски.
Алавес – Сивера, Горосабель (Теналья, 85), Абкар, Марин, Дуарте, Хави Лопес, Гуриди (Хаджи, 79), Антонио Бланко (Мендес, 85), Гевара, Риоха (Реббаш, 63), Омородион (Кике Гарсия, 79).
Огоҳлантиришлар: Левандовски (62), Дуарте (75), Гюндоган (90).