"Маккаби Хайфа" ва "Маккаби Тель-Авив" клублари бу йил Европа кубоги учун қолган уй учрашувларини Сербияда ўтказишади, дея хабар беради УЕФА расмий сайти. Аввалроқ ташкилот ХАМАС билан қуролли можаро авж олгани сабабли Исроилдаги халқаро ўйинларни кейинги огоҳлантиришгача тўхтатган эди.

30 ноябрь куни Европа лигасининг 5-турида "Маккаби Хайфа" Белграддаги "Райко Митич" стадионида "Ренн"га қарши баҳс олиб боради.

"Маккаби Тель-Авив" ва "Зарья" ўртасидаги Конференциялар лигасининг 3-туридан ўрин олган бошқа учрашув 25 ноябрь куни Бачка-Тополадаги "ТСЦ" стадионида бўлиб ўтади. Исроил клуби 14 декабрь куни ҳам у ерда "Гент" билан 6-тур учрашувини ўтказади.

Барча ўйинлар томошабинларсиз ўтказилади.

Исроил эркаклар ва аёллар терма жамоалари Венгриянинг Фелксут шаҳрида ўйин ўтказмоқда.