УЕФА матбуот хизмати Лиссабоннинг «Бенфика» жамоасини мухлисларининг номақбул хатти-ҳаракати учун жазолаганини маълум қилди.
Гап жорий Чемпионлар лигаси гуруҳ босқичи 4-туридан ўрин олган «Реал Сосьедад» - «Бенфика» (3:1) учрашувининг иккинчи бўлимидаги эпизод ҳақида кетмоқда.
Ўшанда Португалия жамоаси мухлислари машъалаларни ёқиб, пиротехника воситаларини Сан-Себастьяндаги стадион майдонига ташлай бошлашди. Туман пайдо бўлди ва учрашувнинг бош ҳаками ўйинни бироз муддатга тўхтатишга мажбур бўлди.
Энди «Бенфика» 25 минг евро жарима тўлаши керак бўлади. Шунингдек, «бургутлар» мухлислари клубнинг еврокубоклардаги навбатдаги сафар учрашувига кела олмайди.
