UYEFA matbuot xizmati Lissabonning «Benfika» jamoasini muxlislarining nomaqbul xatti-harakati uchun jazolaganini ma’lum qildi.
Gap joriy Chempionlar ligasi guruh bosqichi 4-turidan o‘rin olgan «Real Sosyedad» - «Benfika» (3:1) uchrashuvining ikkinchi bo‘limidagi epizod haqida ketmoqda.
O‘shanda Portugaliya jamoasi muxlislari mash’alalarni yoqib, pirotexnika vositalarini San-Sebastyandagi stadion maydoniga tashlay boshlashdi. Tuman paydo bo‘ldi va uchrashuvning bosh hakami o‘yinni biroz muddatga to‘xtatishga majbur bo‘ldi.
Endi «Benfika» 25 ming yevro jarima to‘lashi kerak bo‘ladi. Shuningdek, «burgutlar» muxlislari klubning yevrokuboklardagi navbatdagi safar uchrashuviga kela olmaydi.
