«Ювентус» ярим ҳимоячиси Уэстон Маккенни жамоанинг жорий мавсумдаги истиқболлари ҳақида ўз фикрини айтди.
Массимилиано Аллегри шогирдлари А Серияда иккинчи ўринда бормоқда, аммо кейинги турда биринчи ўринга чиқиши мумкин – бунинг учун икки очко билан пешқадамлик қилаётган «Интер»ни мағлуб этиши керак бўлади. Учрашув 26 ноябрь куни Туринда бўлиб ўтади.
«Албатта, А Серияда осон ўйинлар бўлмайди, аммо ҳозирда биз учун энг муҳими «Интер»га қарши ўйин.
Ушбу ўйинда ғалаба қозониш бизни ажойиб ҳолатга олиб келади, лекин, албатта, ҳар бир кейинги ўйин ҳам жуда муҳим бўлади, чунки устунликни сақлаб қолиш керак.
Ҳозирча башорат қилишга эрта, аммо жамоамиз бу қийинчиликни қабул қилишга тайёр, «Ювентус»га скудеттони қайтариш вақти келди», - дея Маккеннининг сўзларини келтиради Football Italia.
