ОК-2015 саралаш баҳслари «Е» гуруҳи 1-тур учрашувлари доирасидан ўрин олган Ўзбекистон ҳамда Гонконг терма жамоалари ўртасидаги учрашув бошланиш вақтига ўзгартириш киритилди. Бу ҳақда ЎФФ расмий сайти хабар тарқатди.

Мазкур учрашув 6 февраль куни Тошкентдаги «Пахтакор» марказий стадионида бўлиб ўтиши ҳамда учрашувнинг бошланиш вақти 18:00га белгиланганлиги ҳақида аввалроқ хабар бергандик.  Аммо, ОФК мусобақаларни ўтказиш қўмитаси қарорига кўра, учрашув дастлабки белгиланган вақтдан 2 соат аввалга, яъни 16:00 га кўчирилган.

Шундай қилиб, Осиё Кубоги-2015 саралаш баҳслари «Е» гуруҳи 1-туридан ўрин олган Ўзбекистон ҳамда Гонконг терма жамоалари ўртасидаги учрашув 6 февраль куни Тошкентдаги марказий «Пахтакор» стадионида соат 16:00 да бошланиши тасдиқланди. Ушбу учрашувни Али Ҳасан Иброҳим бошчилигидаги баҳрайнлик ҳакамлар бригадаси бошқариб боради.