«Ливерпуль» АПЛнинг кетма-кет тўққизинчи ўйинида мағлуб бўлмади. Жамоа «Арсенал»ни таъқиб қилишда давом этмоқда.

Бугун мерсисайдликлар Лондоннинг «Кристал Пэлас» клуби устидан иродали ғалабага эришди – 2:1.

Шу тариқа, Юрген Клопп жамоасининг мағлубиятсиз серияси Премьер-лигада кетма-кет тўққизта учрашувга етди.

Эслатиб ўтамиз, «Ливерпуль» АПЛнинг ушбу мавсумида фақат битта мағлубиятга учради - бу 30 сентябрь куни «Тоттенхэм»га қарши сафардаги (1:2) ўйинда юз берганди. Ўйиндан сўнг ҳакамлар хатоси туфайли можароси юзага келганди.

Агар барча турнирларни оладиган бўлсак, Клопп шогирдларида иккита мағлубият бор – Европа Лигасида «қизиллар» «Тулуза»дан мағлуб бўлишди (2:3). Ўйин 9 ноябрь куни бўлиб ўтди.