Жозе Моуриньо ва “Рома” футболчилари А Серия ўйинидан сўнг матбуот билан гаплашишдан бош тортишди.
Тўққиз киши бўлиб қолган римликлар 15-турда ўз майдонида “Фиорентина” билан дуранг ўйнади (1:1). “Рома” ярим ҳимоячиси Никола Залевски 64-дақиқада иккинчи сариқ карточка олди, ҳужумчи Ромелу Лукаку 87-дақиқада қўпол ўйин учун тўғридан-тўғри майдондан четлатилди.
Ўйиндан сўнг “бўрилар” футболчилари ва бош мураббийи Моуриньо журналистларга эътибор бермади.
Португалиялик DAZN телеканалига интервью беришдан қочди, "бинафшаранглилар" мураббийи Винченцо Италиано билан саломлашди ва "Олимпико"дан ғойиб бўлди.
TMW хабарига кўра, "Рома" клубдан ҳеч ким сўнгги ўйин ҳақида фикр билдирмасликка қарор қилган.