Осиё Чемпионлар лигасига плей-офф босқичидан иштирокини бошлайдиган Тошкентнинг «Локомотив» клуби дастлабки учрашувни 9 февраль куни сафарда БААнинг «Ан-Наср» клубига қарши ўтказади. Мазкур учрашувни япониялик Масааки Тома бошқариб боради. Бу ҳақда «темирйўлчилар» расмий сайти хабар тарқатдм.

Манбанинг маълум қилишча, Томага қанотларда ҳамюрти Харухиро Отсука ва гонгконглик Чи Хо Ламлар ёрдам беришади. Тўртинчи ҳакам сифатида яна бир япониялик рефери Юдаи Ямамото қайд этилган.

39 ёшли Масааки Тома 2005 йилдан бери ФИФА рефериси ҳисобланади. У ОЧЛнинг 2011 йилги мавсумида мамлакатимизнинг ўша пайтдаги чемпиони «Бунёдкор» ва Саудия Арабистонининг «Ал-Иттиҳод» клублари ўртасидаги гуруҳ босқич ўйинини бошқарган. Ўшанда Қосимов шогирдлари «ЖАР»да 0:1 ҳисобида имкониятни бой беришганди. Шунингдек, Масааки Тома ўша йили «Бунёдор»нинг нимчорак финал ўйинида ҳам ҳакамлик қилган. Бу сафар ҳам «қалдирғочлар» имкониятни бой беришган. Улар сафарда «Сепоҳон»га 3:1 ҳисобида ютқазиб, мусобақадан чиқиб кетишганди.

ОФК Чемпионлар лигаси-2013. Плей-офф босқичи
9 февраль, шанба. Соат 20:00 (Абу-Даби вақти билан)
«Ан-Наср» (БАА) – «Локомотив» (Ўзбекистон)
Бош ҳакам: Масааки Тома (Япония).
Қанот ҳакамлари: Харухиро Отсука (Япония), Чи Хо Лам (Гонгконг).
Тўртинчи ҳакам: Юдаи Ямомота (Япония).
Назоратчи: Жасим Муҳаммад Маҳмуд (Баҳрайн).
Комиссар: Муним Исса Элиас (Иордания).