Ўзбекистон миллий терма жамоаси 21 январь – 2 февраль кунлари БААда ўқув-машғулот йиғинларини ўтказади. Сафар арафасида Миржалол Қосимов шогирдлари Тошкентда йиғилишди.

Ўзбекистон миллий терма жамоаси бош мураббийи Миржалол Қосимов БААда бўлиб ўтадиган мавсумолди йиғинларига жами 27 нафар футболчини жалб этган бўлиб, 19 январь куни бўлиб ўтган машғулотларда Тошкентга чақирилган футболчиларнинг деярли барчаси иштирок этди. Қозоғистоннинг «Актобе» клубида тўп сурувчи ярим ҳимоячи Темур Кападзе, ҳужумчилар Александр Гейнрих ҳамда Марат Бикмаев, шунингдек, Хитойнинг «Чангчун Ятаи» клуби ҳимоячиси Анзур Исмоилов БААда терма жамоа сафига келиб қўшилишади.

Ўзбекистон миллий терма жамоаси сардори ва Саудия Арабистонининг «Аш-Шабоб» клуби ярим ҳимоячиси Сервер Жепаров, яқинда Москванинг «Локомотив» клубига ўтган ҳимоячи Виталий Денисов, шунингдек, Махачқалъанинг «Анжи» клуби етакчиларидан бири Одил Аҳмедовга ўз клублари сафида мавсумга тайёргарлик кўриш имкони берилди.

Ўзбекистон миллий терма жамоасининг 19 январь куни бўлиб ўтган машғулотларидан тайёрланган фоторепортаж билан ЎФФ расмий сайтида танишишингиз мумкин.