ОФК Осиё чемпионлар лигаси плей-офф босқичи учун ташланадиган қуръа тартибини тасдиқлади. Аввал хабар бериб ўтганимизга нисбатан битта ўзгариш бўлди.

"Насаф" 1-ўринни эгаллаган клублар орасида энг ёмон натижага эга бўлгани учун 2-саватга ажратилиши ҳақида айтиб ўтгандик. Аммо бундай қилинмайдиган бўлди. Дастлаб мини-қуръа ёрдамида 1-саватчадаги бир жамоа 2-саватга ўтказилади (бу жамоа номи ошкор қилинмасдан 2-саватга солинади).

Шундай йўл билан саватлардаги жамоалар сони тенглаштирилади.

Ғарб минтақаси

1-сават:
"Ал-Ҳилол" (Саудия Арабистони)
"Ан-Наср" (Саудия Арабистони)
"Ал-Иттиҳод" (Саудия Арабистони)
"Ал-Айн" (БАА)
"Насаф" (Ўзбекистон)

2-сават:
"Навбаҳор" (Ўзбекистон)
"Сепоҳон" (Эрон)
"Ал-Файҳа" (Саудия Арабистони)

Бир гуруҳдан чиққан жамоалар бу босқичда ўзаро тўқнаш келишмайди ("Навбаҳор" "Ал-Ҳилол"га тушмайди. Масалан, қуръада "Навбаҳор" номи тортилгандан кейин "Ал-Ҳилол" клуби чиқиб қолса, "Ҳилол" кейинги жамоа рақиби сифатида қайд этилади).

Бир мамлакат жамоалари ўзаро тўқнаш келиши мумкин.

Нимчорак финал баҳслари Ғарб минтақасида дастлабки учрашувлар 12-13 февраль, жавоб баҳслари эса 19-20 февраль кунлари ўтказилади. Шарқда эса ўйинлар 13-14 февраль ва 20-21 февраль кунлари бўлиб ўтади.

Бу мусобақа учун охирги қуръа бўлиб, кейинги босқичдаги жуфтликлар ҳам олдиндан белгилаб қўйилди.

Чорак финал жуфтликлари қуйидаги кўринишда бўлади:

Ғарб минтақаси (4-5 март ва 11-12 март)
1-нимчорак финал ғолиби — 2-нимчорак финал ғолиби
3-нимчорак финал ғолиби — 4-нимчорак финал ғолиби

Шарқ минтақаси (5-6 март ва 12-13 март)
5-нимчорак финал ғолиби — 6-нимчорак финал ғолиби
7-нимчорак финал ғолиби — 8-нимчорак финал ғолиби

Ярим финал

Ғарб минтақаси (16 апрель ва 23 апрель)
1-ЧФ ғолиби — 2-ЧФ ғолиби

Шарқ минтақаси (17 апрель ва 24 апрель)
3-ЧФ ғолиби — 4-ЧФ ғолиби

Финал 2 ўйиндан иборат бўлади. Илк ўйин Шарқ минтақаси ғолиби майдонида (11 май), жавоб баҳс Ғарб минтақаси вакили стадионида ўтказилади (25 май).