Бугун “Бунёдкор” Академиясида клуб Бош директори Мурод Алиев, спорт директори Ислом Иномов ва техник директор Виталий Ни жамоа аъзолари билан учрашди. Учрашувда Мурод Боқиевич якунланган мавсумни кутилганидек ўтказа олмаган шонли тарихга эга жамоамизнинг мақсади ҳамда шиори ўзгармаслигини таъкидлар экан, “Бунёдкор” 2024 йил ўз тарбияланувчиларига алоҳида эътибор қаратилишини маълум қилди. Албатта, ёшларнинг иштиёқи тажриба билан уйғунлаштирилади. Таркиб шунга мос равишда шакллантирилади.

Таъкидлаш керакки, бугун бошланган ва 28 декабрга қадар давом этадиган машғулотларга ўз вақтида “Бунёдкор”да ҳам футболчи, ҳам мураббий сифатида фаолият юритган Анвар Ғофуров ва Абдуҳамид Қодиров бошчилик қилади. Айни вақтда бир қатор мураббийлар билан музокаралар олиб борилмоқда. Тез орада 2024 йилги мавсумда “Бунёдкор” устозига айланадиган мутахассис ва унинг штаби ҳақида маълумот берилади.