Россия Премьер-лигасининг «Краснодар» жамоасига қарши назорат учрашувидан сўнг ўз фикрлари билан ўртоқлашар экан, Ўзбекистон миллий терма жамоаси бош мураббийи Миржалол Қосимов мағлубиятдан фожеа ясашга ҳожат йўқлигини айтиб ўтди.

Ўзбекистон миллий терма жамоаси 23 январь куни Дубайдаги ўқув-машғулот йиғинлари доирасида даслабки назорат учрашувини ўтказди. Биринчи давра якунларига кўра Россия Премьер-лигасида 16 жамоа орасида 10-ўринда бораётган «Краснодар» клуби Қосимов шогирдларининг 2013 йилдаги илк рақиби бўлди. Ўйин 1:0 ҳисобида рус жамоаси фойдасига ҳал бўлди.

«Дубайга келганимизга энди икки кун бўлди. Ҳозирда мавсумнинг бўлажак муҳим баҳсларига тайёргарлик жараёни давом этмоқда. «Краснодар»га қарши баҳс эса – ўртоқлик учрашуви ва бунда натижага эътибор бериш керак эмас», - деди миллий терма устози.

«Бундай ўйинларда натижа катта аҳамиятга эга эмас. Биз бу каби ўйинлар орқали терма жамоага чақирилган футболчиларнинг ҳозирги ҳолати, жисмоний тайёргарлиги тўғрисида тасаввурга эга бўламиз. Ўйин давомида «Краснодар» ўзининг яхши жамоа эканлигини кўрсата олди, яхши ҳаракат қилди. Ушбу ўйиндан сўнг ҳозирги ҳолатдаги ўзимизнинг кучли ва кучсиз томонларимизни билиб олдик. Бу мағлубиятдан ҳеч қандай фожеа ясаётганимиз йўқ», - дея қўшимча қилди Ўзбекистон миллий терма жамоаси бош мураббийи Миржалол Қосимов.

Эслатиб ўтамиз, Ўзбекистон миллий терма жамоаси 2 февраль куни БАА йиғинини якунлаб, Тошкентга қайтади. Миржалол Қосимов Осиё Кубоги-2015 саралаш ва ЖЧ-2014 саралаш ўйинларига тайёргарлик доирасидаги илк йиғинга 27 нафар футболчини жалб этган. Йиғин доирасида, 1 февраль куни Озарбойжон миллий терма жамоасига қарши ўртоқлик учрашуви ўтказилиши режалаштирилган. Шунингдек, йиғин давомида бошқа ўртоқлик учрашувлари ҳам ташкил этилиши мумкин.