"Комо" клуби бош мураббийи вазифасини бажарувчи Сеск Фабрегас "Палермо" билан 23 декабрь куни бўлиб ўтадиган Б Сериянинг 18-тур учрашувидан сўнг ўз лавозимини тарк этади, дея хабар бермоқда ESPN нашри.
36 ёшли испаниялик мутахассисда фаолиятини давом эттириш учун керакли мураббийлик малакаси йўқ. У аввалроқ Италия футбол федерациясидан (FIGC) вақтинчалик рухсатнома олганди, унинг муддати 24 декабрь, якшанба куни тугайди.
Январь ойида уэльслик Осиан Робертс "Комо" бош мураббийига айланади. У бу лавозимда мавсум охиригача ишлайди ва уни клубларни ривожлантириш бўлими бошлиғи лавозими билан бирлаштиради.
Фабрегас "Комо" мураббийлар штабида қолади ва яқин ойларда ишлаш учун керакли лицензияни олиши керак.
Испаниялик мураббий 13 ноябрдан бери "Комо"ни бошқариб келмоқда. Фабрегас қўл остида клуб тўрт марта ғалаба қозонган, бешта ўйиндан биттасида мағлуб бўлган ва 17 учрашувдан сўнг Б Серияда учинчи ўринни эгаллаб турибди.
