Қиличбозликнинг сабля йўналиши бўйича Ўзбекистон терма жамоаси етакчилари, яккалик дастурда Париж-2024 йўлланмаси учун кураш олиб бораётган Зайнаб Дайибекова, Шерзод Мамутов ҳамда Муса Aймуратов Венгрияга йўл олишди. Ҳамюртларимиз ушбу шаҳарда халқаро ўқув-йиғин машғулотида иштирок этишади.
Халқаро қиличбозлик федерацияси тақвимига кўра, Будапешт 6-7-январ кунлари ёшлар ўртасидаги Жаҳон кубоги босқичига мезбонлик қилади.
Мазкур мусобақа доирасида М.Aймуратов ўз омадини синаб кўради. Венгрия йиғини якунига етганидан сўнг юртдошларимиз 10-январ куни Тунисда ўтадиган катталар ўртасидаги Гран-при турнирига йўл олишади.