“Андижон” жамоаси сардори Илдар Маматказин якунига етган мавсумда ҳам етакчилик хусусиятларини намойиш қилди ва жамоанинг муваффақиятларига ўз ҳиссасини қўшди. Футболчи ортда қолган чемпионат борасида фикр билдирди.

— Илдар, "Андижон"да иккинчи ёшлигингизни ўтказяпсиз, десак бўладими? Ҳар ҳолда бу йил ҳимоячи бўлишингизга қарамай, 2 та гол урдингиз ва барқарор ўйнадингиз...
— Шунақа деса ҳам бўлади. Биринчи ўринда профессионаллик. Ёшингиз ўтган сари профессионалликка кўпроқ эътибор бериш муҳим. Машғулотларда кўпроқ тер тўкиш керак. Ҳа, тўғри, ҳимоячи бўлишимга қарамасдан 2 та гол урдим. Кўпроқ гол урсам ҳам бўларди. Ҳар қандай ҳолатда ҳам жамоамга фойдам текканидан хурсандман.

— Умуман, 2023 йил сиз учун нимаси билан ёдда қоладиган бўлди?
— Эсда қоларли натижалар бўлди, айниқса, лидер жамолар билан яхши натижаларга эришдик.

— "Андижон"нинг ушбу мавсумдаги иштирокини ижобий баҳолашмоқда. Бу борада нима деган бўлардингиз?
— Мавсум бошидаги вазифамиз 10 таликка кириш эди. Албатта, яхши натижа бўлди, бу мураббий томонидан берилган кўрсатмаларни тўғри бажарилиши ва энг асосийси, бу коллектив! Коллективсиз футболда ҳеч нарсага эришиш қийин.

— Ҳимоячи сифатида сизга бу йил қайси ҳужумчи хавф туғдирди?
— Менга “Сурхон” ҳужумчиси яхши таассурот қолдирди. Лекин энг хавфли ҳужумчи Рубин Хебай! Бу менинг жамоадошим бўлгани учун айтмаяпман. Чунки машғулотларда шуни сездим, у Суперлиганинг энг хавфли ва кучли ҳужумчиси!

— Жиянингиз Ислом Маматказин бу йил анча қўшди ва бемалол сизга рақобатчига айлана оляпти. Ундан бундай кўтарилишни кутганмидингиз?
— Албатта, кутганман. Исломда яхши потенциал бор,  фақат шу потенциални янада яхши ривожлантириш керак. Ўз устида кўпроқ ишлаш керак. Буни унинг ўзи ҳам тушуниб турибди.

— Янги мавсумда нималарни режалаштиряпсиз ва нималар кутяпсиз?
— Янги йилга фақат яхши ният қиляпман. Худо хоҳласа, мухлисларимизни янада хурсанд қилмоқчимиз. Шу ўринда ҳаммани кириб келаётган янги йил билан табрикламоқчиман.

"Андижон" матбуот хизмати.