Ўзбекистон миллий терма жамоаси ва Тошкентнинг «Бунёдкор» клуби айни пайтда БААнинг Дубай шаҳрида ўқув-машғулот йиғинларини ўтказаяпти.

28 январь куни эрталаб «Бунёдкор» жадвал асосида машғулотларга келади. Тошкентликлар шуғулланиб бўлгач, ортга қайтаётиб, худди шу ерда машқ қиладиган Москванинг «Локомотив» жамоаси дарвозадан кириб келаётганда бир-бирларига дуч келадилар.

«Локомотив» 28 январь кунига «двухсторонка» (йодга бой балиқни кунда еган бўлсам ҳам, таржимага калла ишламади) режалаштирганди. Нима бўлди-ю, уларга битта қўшимча дарвозабон керак бўлиб қолди. Шунчалик керак бўлиб қолган бўлиши мумкинки, улар майдондан чиқиб кетаётган «Бунёдкор» клубидан дарвозабон сўрайдилар.

Бизникилар йўқ дейишмайди. «Бунёдкор» Зафар Сафоевни қолдиради.

Ўйин бошланади. «Локомотив» иккига бўлиниб ўйнайди. Бир дарвозада «Бунёдкор» кипери Зафар Сафоев. Яхши ўйнайди. Ҳатто, Россия терма жамоаси футболчиси, шу куни «Локомотив»нинг Сафоевга рақиблик қилган нариги жамоасида ўйнаган футболчиси Денис Глушаков тепган пенальтини ҳам қайтаради.

Бироқ, Сафоевнинг жамоадошлари 1:2 ҳисобида ютқазишади.

Машғулотлар режасига путур етмайди. «Локомотив» Сафоевга миннатдорчилик билдириб, уни кузатиб қўяди. Балки, пенальтини қайтаргани, балки бузилаётган режани қутқариб қолиб, машғулотнинг бир текисда ўтишида қатнашгани учунми, ёки Виталий Денисовнинг ҳурмати сабабми, ишқилиб, Сафоевга «Локомотив» клуб формаси ва бутсини эсдалик совға сифатида топширади.

«Локомотив» биз Дубайда яшаётган меҳмонхонада истиқомат қилаяпти. Уларгача бу ерда «Зенит» бўлган эди.

2 февралгача шу ердамиз.

Санжар Ризаев, ЎФФ матбуот котиби.