1 январь куни Европанинг бир қатор топ-лигаларида қишки трансфер ойнаси очилди. Бир ой ичида клублар футболчиларни сотиб олиш ёки ижарага олиш имкониятига эга бўлади.
Луис Суарес: “Гремио” → “Интер Майами” (эркин агент)
Девид Бекхем Лионел Месси Майамида қулай бўлиши учун ҳамма нарсани қилмоқда. Аста-секин "Интер" бир вақтлар Барселонада Лео билан бирга ўйнаган 30 ёшдан ошганлар клубини шакллантирмоқда. Жорди Альба, Серхио Бускетс ва энди Луис Суарес. Уругвайнинг бу ҳаракатини кутилмаган деб аташ мумкин эмас, чунки бу ҳақда аввалги ойлар давомида мунтазам равишда ёзиб борилди. Фахрий "1+1" схемаси бўйича шартнома имзолади.
Эмиль Форсберг: “РБ Лейпциг” → “Ню-Йорк Ред Буллс”
Форсберг "Лейпциг"да 9 йил ўйнади. Швециялик иккинчи Бундеслигадан Чемпионлар лигасининг плей-офф босқичигача йўл олди. Германия кубогида иккита, мамлакат Суперкубогида битта ғалабага эришди. 324 учрашув, 71 гол, 69 голли узатма. Энди Форсберг фаолиятини хорижда давом эттиради ва албатта, Ред Булл клубида. Ярим ҳимоячи 2024 йилнинг 1 январидан кучга кирган “2+1” схемаси бўйича шартнома имзолади.
Уго Льорис: "Тоттенхэм" → “Лос-Анжелес”
Франциялик дарвозабон "Тоттенхэм"да 11,5 йил ўтказди ва шу вақт ичида 444та ўйинда майдонга тушди. Ллорис ўтган мавсумни соғлиғидаги муаммолар туфайли ўтказиб юборди ва бу йил у майдонга тушмади. 2023 йилнинг сўнгги кунида "Тоттенхэм" ўз майдонида "Борнмут"ни мағлуб этди (3:1), Ллорис эса ўйин олдидан майдонга тушиб, мухлислар билан хайрлашди.
Эрик Байи: “Бешиктош” → “Вильярреал” (эркин агент)
Африкалик ҳимоячи 2023 йилнинг сентябрида “Бешиктош”га ўтган, бироқ атиги 4 ой ўтиб клубини ўзгартирган. У Туркияда бор-йўғи саккизта ўйинда майдонга тушди. Раҳбарият Эрик ўз ишини нопрофессионал бажараётганини ва жамоа ичидаги муҳитга салбий таъсир кўрсатаётганини сезди. Байи “Вильярреал”га қайтди ва у ердан 2016 йилда “Манчестер Юнайтед”га ўтган эди.
Донни ван де Бек: “Манчестер Юнайтед” → “Айнтрахт Франкфурт” (ижара)
Ван де Бек ниҳоят “Манчестер Юнайтед”ни тарк этди. Ҳар икки томон ҳам хурсанд бўлган ҳолатга ўхшайди. Тўғри, ҳозирча нидерландиялик футболчи "Манчестер Юнайтед"ни ижара асосида тарк этган, аммо "Айнтрахт" сотиб олиш ҳуқуқига эга. Жорий мавсумда 26 ёшли ярим ҳимоячи бор-йўғи 21 дақиқани майдонда ўтказди. Уч йил аввал “Манчестер Юнайтед” футболчини “Аякс”дан 39 миллион еврога сотиб олганди, аммо ўшандан бери у инглиз клубида ўзини кўрсата олмади.
Саломон Рондон: “Ривер Плейт” → “Пачука” (эркин агент)
2023 йил бошида Рондон Аргентинага кўчиб ўтди ва "Ривер Плейт" билан шартнома имзолади. У ерда 35 та ўйин ўтказиб, 10 та гол урган. Бироқ йил охирида томонлар ўзаро келишувга кўра шартномани бекор қилишди. Сабаби - оилавий қийинчиликлар ва мослашиш билан боғлиқ муаммолар. Рондон Колумбия лигасига ўтиш вариантидан бош тортди ва мексикалик "Пачука" билан шартнома имзолади.
Лукас Бералдо: “Сан-Паулу” → “ПСЖ” (20 миллион евро)
Бразилиялик футболчи фаолиятини Европанинг топ-клубларидан бирида давом эттиради. Парижликлар 20 ёшли футболчини сотиб олиш учун 20 миллион евро сарфлашди.Табиийки, бунгача Бералдо фақат ватанида ўйнаган. У “ПСЖ билан 5,5 йиллик шартнома имзолади ва 35-рақамни эгаллади. Трансфердан сўнг Бералдонинг ўзи бу ўтишни фаолиятидаги муҳим қадам деб атади.
