Екатеринбургнинг «Урал» жамоаси бош мураббийи Павел Гусев Ўзбекистонга қарши ўйинда футболнинг азалий қонуни иш кўрсатганини таъкидлаб ўтди.

28 январь куни Ўзбекистон миллий терма жамоаси Дубайдаги ўқув-машғулот йиғинлари доирасида иккинчи ўртоқлик учрашувини ўтказди. Россия 1-дивизиони пешқадамларидан бири – «Урал» жамоасига қарши ўйинда «Бунёдкор» ярим ҳимоячиси Жасур Ҳасанов томонидан урилган гол Қосимов шогирдлари 1:0 ҳисобидаги ғалабани келтирди.

«Умуман олганда, ўйин курашлар остида ўтди. Ҳар иккала жамоада ҳам муваффақиятга эришиш учун имкониятлар бор эди. Футбол қонунлари шундай аёвсиз: сен урмасанг, сенга уришади. Бизда юз фоизлик имконият пайдо бўлганди, Манучарян ундан фойдаланиши керак эди. Шундан кейинги қарши ҳужумдан эса ўзбекистонликлар фойдаланиб қолишди», - деди Гусев.

«Бугунги ўйиндан кўнглим тўлди. Яхши рақибга қарши яхши ўйин бўлди. Ўзбекистон миллий терма жамоасига муваффақиятлар тилаб қоламан», - деди «Урал» бош мураббийи Павел Гусев.

Эслатиб ўтамиз, Ўзбекистон миллий терма жамоаси хориж йиғини доирасида бунгача Россия Премьер-лигаси вакили – «Краснодар» жамоасига қарши майдонга тушиб, 0:1 ҳисобида имкониятни бой берганди. Қосимов шогирдлари 1 февраль куни Дубайда Озарбойжон миллий терма жамоасига қарши ўртоқлик ўйинида майдонга тушишади.

Миллий терманинг хориж йиғини 2 февраль куни якунига етади.