"Тоттенхэм" "Лейпциг"дан Тимо Вернерни ижарага олишга рози бўлди.
Олдинроқ клублар форварднинг трансфери борасида музокаралар олиб бораётгани ҳақида хабар берилганди. Вернер Анж Постекоглу бошчилигида ишламоқчи бўлгани учун бу кўчишга рози бўлди.
The Athletic нашри хабарига кўра, "Тоттенхэм" ва "Лейпциг" ўртасидаги музокаралар якуний паллада. Премьер-лига клуби Вернерни 15-20 миллион еврога сотиб олиш ҳуқуқи билан мавсум охиригача ижарага олади.
Маълум қилинишича, Вернер яқин орада "Тоттенхэм"да тиббий кўрикдан ўтади. Клуб ҳужумчининг ижара давридаги маоши учун тўлиқ жавобгарликни ўз зиммасига олади.
Бундеслиганинг жорий мавсумида Вернер 8 та ўйин ўтказиб, ўртача 25 дақиқа ўйнади ва 2 та гол урди.
