Ўзбекистон миллий терма жамоаси БААдаги ўқув-машғулотларини давом эттирмоқда.

31 январь куни Ўзбекистон миллий терма жамоаси футболчилари амалий ва назарий машғулотларни ўтказишди. ЎФФ матбуот котиби Санжар Ризаев берган хабарга кўра, назарий машғулотларни миллий терма жамоа катта мураббийи Шуҳрат Мақсудов ўтказади. Бунга сабаб – терма жамоа билан бир вақтда БААда йиғин ўтказаётган «Бунёдкор» жамоаси 31 январь куни Москванинг «Спартак» жамоасига қарши назорат учрашувида майдонга тушади ва Қосимов клуб билан бирга бўлади.

Терма жамоа машғулотларида Қосимов йиғинга жалб қилган (жароҳати сабаб Тошкентга қайтган Иван Нагаевдан ташқари) барча футболчилар иштирок этишмоқда. Шу вақтгача алоҳида, индивидуал машғулотлар билан чекланган ярим ҳимоячи Санжар Турсунов ҳам 31 январдан эътиборан умумий гуруҳ билан шуғулланишни бошлаган. Қайд этиш жоиз, терма жамоага жалб қилинган «Бунёдкор» дарвозабонларидан бири – Мурод Зуҳуров «Спартак»га қарши ўйинда клуби сафида майдонга тушиши эҳтимоли бор.

Эслатиб ўтамиз, 1 февраль куни Ўзбекистон миллий терма жамоаси БААдаги ўқув-машғулот йиғинлари доирасидаги сўнгги ўртоқлик учрашувини ўтказади. Озарбойжон миллий терма жамоасига қарши Дубайда бўладиган баҳс Тошкент вақти билан 19:00да бошланади.