Ўзбекистон миллий терма жамоаси 4 февраль куни «Пахтакор» марказий стадионида машғулотлар ўтказди. Худди шу куни Гонгконг терма жамоаси ЎФФ сунъий қопламали майдонида шуғулланди.

Миржалол Қосимов қўл остидаги Ўзбекистон миллий терма жамоаси Гонгконг терма жамоасига қарши Осиё Кубоги-2015 саралаш «Е» гуруҳи 1-тур учрашувига тайёргарликни Тошкентда давом эттирмоқда. Миллий терма жамоа 4 февраль, душанба куни, куннинг иккинчи ярмида «Пахтакор» марказий стадионида машғулотлар ўтказди. Эслатиб ўтамиз, 6 февраль куни белгиланган расмий учрашув ҳам айнан шу ўйингоҳда бўлиб ўтади.

30 январь куни ЎФФ Терма жамоалар маркази директори томонидан эълон қилинган таркиб бўйича ҳозирча барча футболчи, жумладан, Махачқалъанинг «Анжи» клуби ярим ҳимоячиси Одил Аҳмедов, миллий терма жамоа сардори Сервер Жепаров, Саудиянинг «Ан-Наср» клуби ҳимоячиси Шавкат Муллажонов терма ихтиёрига етиб келган. Машғулотларда, шунингдек, Ўзбекистоннинг 2012 йилги энг яхши ўйинчиси Санжар Турсунов ҳам иштирок этмоқда.

Ушбу футболчи терма жамоанинг БААдаги йиғинида тўлиқ иштирок этган, бироқ машғулотларнинг асосий қисмини якка ҳолда ўтказиб, фақатгина Озарбойжонга қарши ўртоқлик учрашуви арафасида умумий гуруҳга қўшилган эди. Турсунов Қосимов шогирдларининг хориж йиғини доирасидаги сўнгги ўртоқлик ўйинида 20 дақиқа давомида майдонда ҳаракат қилган эди.

Қўшимча сифатида, Ўзбекистон миллий терма жамоаси бош мураббийи Миржалол Қосимов ва Гонгконг миллий терма жамоаси бош мураббийи, жанубий кореялик мутахассис Ким Пан Гон иштирокидаги матбуот анжумани 5 февраль куни «Пахтакор» марказий стадиони анжуманлар залида бўлиб ўтишини эслатиб ўтамиз. Анжуман 11:00да бошланади.