“Бунёдкор”нинг Анталиядаги биринчи спарринг рақиби Қозоғистоннинг амалдаги чемпиони – Қарағанданинг “Шахтёр” клуби бўлди.

“Қалдирғочлар” 8 февраль куни Истанбул орқали Анталияга етиб боришди ва Сиде худудидаги “Blue Waters” меҳмонхонасига жойлашишди. Анталиядаги иккинчи кундаёқ Қозоғистоннинг кучли жамоасига қарши назорат учрашуви ўтказилди.

Учрашув “қалдирғочлар”нинг устунлигида бошланди. Миржалол Қосимов шогирдлари қисқа-қисқа паслар оширишиб, комбинацион ўйин кўрсатишган ҳолда рақибни тўпсизлантиришга эришишди.

“Бунёдкор”нинг дастлабки дақиқалардаги ҳужумларини якунлашда аниқлик етишмади. Баъзи ҳолларда эса рақиб посбони ишончли ўйин кўрсатди. Учрашувнинг 33-дақиқасида Жасур Ҳасанов узатган пасни Лутфулла Тўраев “Шахтёр” дарвозасига жойлаб, ҳисобни очди – 1:0.

Биринчи бўлимнинг сўнгги дақиқаларида Виктор Кумиков бошқарувидаги қарағандаликлар стандарт вазиятидан унумли фойдаланишди – 1:1. Иккинчи бўлимда эса жамоамиз таркибида янги футболчилар пайдо бўлди.  Бироқ ҳисобни ўзгартириш ҳеч кимга насиб этмади.

“Бунёдкор”нинг янги мавсумга қаратилган тайёргарлиги давом этмоқда. Айни пайтда мураббийлар штаби таркибда мавжуд бўлган барча футболчиларни назорат учрашувларида майдонга туширишиб, уларни ҳозирги ҳолатини синовдан ўтказиб олишмоқда. Асосий таркибни муносибларни аниқлаб, жамоа шакллантирилмоқда.

“БУНЁДКОР” – “ШАХТЁР” 1:1 (1:1)
Гол: Лутфулла Тўраев 30
“Бунёдкор”: Акбар Тўраев, Хайрулла Каримов, Анвар Ғофуров, Артём Филипосян, Акмал Шораҳмедов, Олег Зотеев, Жасур Ҳасанов, Лутфулла Тўраев, Фозил Мусаев, Адмир Адрович, Игорь Таран
Захирадан майдонга тушганлар: Алибобо Раҳматуллаев, Александр Пишур, Саҳоб Жўраев, Шавкат Саломов, Камолиддин Мурзоев, Дилшод Жўраев, Абдуқаҳҳор Хожиакбаров, Жавлон Иброҳимов