Ўзбекистон терма жамоаси собиқ футболчиси Жаъфар Ирисметов Ўзбекистоннинг Осиё кубоги нимчорак финал босқичида Таиландга қарши бўлиб ўтган ўйин борасида ўз фикрларини билдириб ўтди.

— Энг муҳим — натижа. Биринчи бўлимда тўпни назорат қилдик ва голга тортадиган вазият яратдик. Иккинчи таймда эса бироз чарчаб қолдик ва рақибга ҳужум қилиш имконини бердик. Ҳаттоки ҳисоб тенглашди. Остон Ўрунов яна ҳужумнинг олди чизиғида туширилгани ғалати. Яна ҳужумчисиз ўйин ўтказдик. Диёр Холматов асосий таркибда майдонга тушгани зўр бўлди. Холматов голга узатма берди. Турғунбоев билан "Пахтакор"ча боғлам ишлади. Ўрунов эса, очиғини айтсам, ўзини у қадар яхши кўрсата олмади, ўзининг энг кучли жиҳатидан фойдаланмади.

Йигитлар чарчагани сезилди. Уларга бироз оғир бўлди. Айни пайтда мураббийлар учун энг муҳими — Қатарга қарши ўйин олдидан футболчиларни жисмоний жиҳатдан тиклаб олиш. Баъзи футболчилар сафга қайтади ва танлов имконияти бўлади. Ўйлашимча, мураббий ўйинни таҳлил қилади ва хатоларни тўғирлайди.

Файзуллаев эса яхши ҳаракат қилдик ва гол урди. Гол урар экан, демак, яхши ўйнади. Аббосга катта умидлар билдириляпти. У ўз даражасида ҳаракат қилди. Унга нимадир етишмади, балки, толиққандир. Биз эса ундан кўпроғини кутяпмиз.

Кейинги ўйингача у тикланиб олиб, янада яхшироқ ўйнайди, деб умид қиламан. Ғалаба қозондикми, демак, барча яхши ўйнайди! Агар Ўзбекистонга кейинги учрашувда ғалаба қозонса, ярим финалга чиқади. Ғалабалар кутамиз!» – деди Ирисметов.