"Манчестер Юнайтед" узоқ вақтдан бери Маркус Рэшфорднинг турмуш тарзидан хавотирда.

Эслатиб ўтамиз, ўтган ҳафта Рэшфорд тунги клубга ташриф буюргани, кейин эса машғулотларни ва Англия кубоги доирасидаги "Ньюпорт"га қарши ўйинни "касаллиги туфайли" ўтказиб юборгани маълум бўлган эди. Маркус 650 минг фунт жаримага тортилиши мумкинлиги ҳақида маълумот бор эди.

The Sun нашрининг ёзишича, Рэшфорднинг зиёфатга бўлган муҳаббати 2021 йилда "Манчестер Юнайтед" раҳбариятини ташвишга солган.

Маълумотларга кўра, "Манчестер Юнайтед" форвардини бир неча бор казинода кўришган ва у аввалроқ ўз жамоадошлари билан покер ўйнаган. Бундан ташқари, Маркуснинг хулқ-атворига оилавий муаммолар ва болалигида танишган қиз дўсти Лючия Лои билан ажралиши салбий таъсир кўрсатди.

Қайд этилишича, "Манчестер Юнайтед"нинг собиқ футболчиси Уэйн Руни вазиятни муҳокама қилиш ва уни қўллаб-қувватлаш учун Маркус билан боғланган. У "Дерби Каунти"да ишлаётган вақтида Рэшфордга қўнғироқ қилиб, унга маслаҳат беришга доим тайёр бўлишини айтди. Давид Бэкхем ва Рио Фердинанд ҳам ҳужумчи билан гаплашган.