Футзал бўйича Ўзбекистон чемпионати 2-босқич плей-офф раунди (чорак финал) 1-тур учрашувлари 21-23 февраль кунлари «Ўзбекистон» спорт мажмуасида бўлиб ўтади.

Аввал хабар берганимиздек, 21-24 январь кунлари Самарқанд шаҳрида футзал бўйича Ўзбекистон чемпионати 1-боcқич 4-тур учрашувлари бўлиб ўтган эди.

Ўйинлар якунига кўра, чорак финал жуфтликлари маълум бўлганди. Мусобақалар регламентига кўра, жамоалар 4-турдан кейин мусобақа жадвалида эгаллаган ўрнига кўра жуфтликларга бўлинган эди (тартиб рақамлари бўйича: 1-8, 2-7, 3-6, 4-5).

Шундай қилиб, жорий мавсум етакчиси «Ардус»га дастлабки тўрт тур якунига кўра 8-ўринни эгаллаган Сирдарё вилоятининг «Гулистон» рақиб бўлади. Чемпионатнинг иккинчи жамоаси – «Локомотив» плей-офф раундида Бухоронинг «Когон» жамоасига қарши тўп суради – бухороликлар дастлабки босқичда 7-ўринни эгаллашган эди.

Худди шу тартибда, «Максам-Чирчиқ» «Пахтакор» билан ўйнаса, «Бунёдкор» Андижон вилоятининг «Турон-С» жамоаси билан баҳс олиб боради.

Ўзбекистон чемпионатининг чорак финал ўйинлари плей-офф тизимида ўйналади ва иккита ўйинда ғолиб чиққан жамоа кейинги босқич йўлланмасини қўлга киритади. Акс ҳолда, жамоалар учинчи ўйинни ҳам ўтказишлари керак бўлади.

Қайд этиш жоиз, Самарқанднинг «Нафис» ва Навоий вилоятининг «Строитель-Зарафшон» жамоалари учун мавсум якунига етди. 4-тур якунига кўра, бу жамоалар – мос равишда – 9 ва 10-ўринни эгаллашди.

Футзал бўйича Ўзбекистон чемпионати 2-босқич плей-офф раунди 1-тур ўйинлари тақвими
21 февраль, пайшанба
10:00. Ардус – Гулистон
12:00. Турон-С – Бунёдкор
14:00. Максам-Чирчиқ – Пахтакор
16:00. Когон – Локомотив

22 февраль, жума
10:00. Гулистон – Ардус
12:00. Бунёдкор – Турон-С
14:00. Пахтакор – Максам-Чирчиқ
16:00. Локомотив – Когон

_______________________
23 февраль, шанба
10:00. Ардус – Гулистон
12:00. Турон-С – Бунёдкор
14:00. Максам-Чирчиқ – Пахтакор
16:00. Когон – Локомотив