Хабарингиз бор, 2012 йилнинг 18 декабрида Вазирлар Маҳкамасининг «Мамлакатимизда аёллар футболини ривожлантиришга оид» қарори қабул қилинган эди. Қарорда 2013 йилдан бошлаб олий лиганинг ҳар бир клуби қошида аёллар футбол жамоаси фаолият олиб бориши шарт қилиб белгиланган.

Ғузорнинг «Шўртан» жамоаси қарор ижросини таъминлаш мақсадида дастлабки қадамларни қўйди. Ғузорда жойлашган «Шўртан» футбол клубига қарашли болалар-ўсмирлар футбол маркази қошида қизлар гуруҳи ташкил қилинди.

Бу борада гуруҳ мураббийи Шуҳрат Файзиев шундай деди: 
— Клубимиз ижрочи директори Икром ака Норчаевнинг ташаббуси билан қизлардан иборат футбол гуруҳини ташкил қилдик. Ҳозир қўл остимда 1999 йилда туғилган 22 нафар қиз шуғулланмоқда. Мана, бир ҳафтадан бери ўзимиздаги майдондаги машғулотларни ўтказиб келяпмиз. Жамоамиз раҳбари асосий эътибор маҳаллий спортчиларга қаратилиши кераклигини айтиб ўтдилар. Шу боис гуруҳимизда фақат ғузорлик қизлар футбол билан шуғулланмоқда.