Тошкентнинг «Пахтакор» клуби матбуот хизмати жамоанинг Осиё Чемпионлар лигасида ўз майдонида ўтказадиган учрашувлари учун аккредитация жараёни бошланганини маълум қилди. Бу ҳақда клуб расмий сайти хабар тарқатди.
Манбада ёзилишича, аккредитация олиш учун ишлайдиган ОАВ томонидан берилган тегишли ҳужжат ёки эркин журналист эканлигини тасдиқловчи ҳужжат ҳамда 3Х4 ҳажмдаги бир дона фотосуратни матбуот хизматига топшириш талаб этилади. Бу жараён 16 февралдан 22 февралгача давом этади.
Эслатиб ўтамиз, жамоанинг Осиё чемпионлар лигасидаги биринчи ўйини 26 февраль куни Саудия Арабистонининг «Ал Иттифоқ» клубига қарши ўтказилади. Учрашув жамоанинг уй стадиони саналмиш «Пахтакор»да бўлиб ўтади.