Ўзбекистон Футбол Федерацияси Ижроия қўмитаси қарорига кўра, «O‘zbekiston Futbol Federatsiyasi» эсдалик нишонини таъсис этиш тўғрисида қарор қабул қилди, дея хабар бермоқда ЎФФ матбуот хизмати
Ўзбекистон Футбол Федерацияси Ижроқўми мамлакат футболини ривожлантириш ва оммавийлаштиришга улкан ҳисса қўшаётган, иқтидорли ёш футболчиларни аниқлаш, тайёрлаш ва тарбиялашда салмоқли хизмат қилаётган, халқаро футбол майдонларида Ўзбекистон номини ва байроғини баланд кўтариш йўлида меҳнат қилаётган шахсларни рағбатлантириш мақсадида «O‘zbekiston Futbol Federatsiyasi» эсдалик нишонини таъсис этди.
Эсдалик нишони қалқон шаклида сариқ рангли мис қуймасида тайёрланган бўлиб, ички қисми футбол майдонининг бир қисмини эслатувчи яшил фонга лотин ҳарфларида, сариқ рангда «UFF» – Ўзбекистон Футбол федерациясининг инглиз тилидаги қисқартмаси ёзилган. Нишоннинг пастки қисмида, футбол тўпини акс эттирувчи тилла суви юритилган айлана ичига бўртирилиб шакл берилган фианит — қимматбаҳо шиша кўз ўрнатилган.
«O‘zbekiston Futbol Federatsiyasi» эсдалик нишони, Ўзбекистон футболида кўрсатган хизматлари учун, Ўзбекистон фуқароси бўлмаган шахсларга ҳам топширилиши мумкин. Эсдалик нишони ЎФФ Президенти номидан тантанали равишда топширилади.
