"Барселона" ярим ҳимоячиси Илкай Гюндоганнинг рафиқаси Сара Арфауи турмуш ўртоғининг Каталония клубига ўтиши ҳақида гапирди. Немис футболчиси Хави Эрнандес жамоасига ўтган ёзда "Манчестер Сити"дан эркин агент сифатида келиб қўшилган эди.
“Мен жуда фахрланаман, чунки Илкай ёшида янги чақирув ҳақида ўйлаш қийин эди. У "Манчестер Сити"да ўзини қулай ҳис қилди ва сардор эди. Бир клубда муваффақият қозониб, кейин бошқа чемпионатга ўтиш ҳар доим таваккалдир. Унинг бу ҳаракатни амалга оширишга қарор қилганидан жуда хурсандман, чунки Илкай болалигиданоқ "Барселона"да ўйнашни орзу қилган", деди Сара.
Гюндоган жорий мавсум Испания чемпионатида 5 та гол урди ва 6 та голли узатмани амалга оширди.
