“Пахтакор” клуби раиси ўринбосари Туркиянинг энг зўр академияларидан бири “Олтинўрда”да бўлди.

Дилшод Каримовни шахсан академияга асос солган Саид Меҳмет Ўзкан кутиб олди. “Пахтакор” делегацияси Европа ва турк футбол клубларига сўнгги 7 йилда 20 нафарга яқин футболчи сотган академиянинг иш услубини Тошкент ва Қибрай базасида қурилиши режа қилинаётган “Пахтакор” ФАда қўллашни режа қилган.

“Клубимиз раиси Жаҳонгир Абидовичнинг топшириғи билан биз келажакда Ўзбекистоннинг турли ёшдаги терма жамоларига топ даражадаги футболчиларни тайёрлаб беришимиз керак. Шунинг учун ўз олдимизга “Пахтакор” академиясини Марказий Осиёда энг зўрларидан бўлишига ҳисса қўшишни режа қилганмиз. Бугун янгиланаётган “Пахтакор” айнан шу ишнинг бошланиши. Саид Меҳмет Ўзкан томонидан бунёд қилинган академия тизимини Тошкентда ярата олсак, нафақат жамоамиз, балки терма жамоаларимизга ҳам жуда катта фойдаси тегади”, дейди Дилшод Мурадович.