“Бордо” ҳужумчиси Альберт Хосуэ Элис кеча, 24-февраль куни бўлиб ўтган Франция 2-лигасининг 26-турида “Генгам”га қарши ўйинда (1:0) бошидан жароҳат олиб, комага тушди. Бу ҳақда Le Parisien нашри хабар бермоқда.

Қайд этилишича, Элис ҳавода рақиб футболчиси билан тўқнашиб кетганидан сўнг майсага ноқулай йиқилиб, ҳушини йўқотган, шундан сўнг уни замбилда майдондан олиб чиқиб кетишган.

Таъкидланишича, "Бордо" футболчиси кейинроқ ҳушига келган, аммо уни касалхонага хавфсиз олиб бориш учун сунъий комага туширилган.

Сўнгги маълумотларга кўра, Элис муваффақиятли операция қилинган. Ҳозир у касалхонада оиласи қуршовида.