Аргентина терма жамоаси ва “Манчестер Сити”нинг собиқ ҳужумчиси Серхио Агуэро фаолиятини давом эттириши мумкинлиги ҳақидаги хабарларни рад этди.
Форвард 2021 йилда юраги билан боғлиқ муаммолар туфайли футболни тарк этган. 25 февраль куни футболчи "Индепендьенте" билан шартнома имзолаши мумкинлиги ҳақида маълумот пайдо бўлди.
“Албатта, бу хабар тарқалди, лекин бу ҳақиқат эмас. "Индепендьенте" билан шартнома тузмайман ва машғулот ўтказмайман. Баъзида одамлар маълумотни бўрттириб юборишади ва бу ҳам шундай янгиликлардан бири. Ҳа, кардиологим соғлигим яхши эканини айтди, аммо машғулот ўтказиш ва яна юқори савияда ишлаш учун яна кўп кўрикдан ўтишим керак”, — дея Агуэро сўзларини келтиради Tyc Sport.
2021 йилнинг июлида Агуэро эркин агент сифатида "Манчестер Сити"ни тарк этди ва "Барселона" билан шартнома имзолади. Ҳужумчи каталонияликлар сафида 5 та ўйин ўтказиб, 1 та гол урди, бироқ 2021 йилнинг декабрида соғлиғидаги муаммолар туфайли фаолиятини якунлашга мажбур бўлди.
