Бугун, 28 февраль куни, Австралияда “Marvel” стадионида Олимпиада саралашининг учинчи босқичидан ўрин олган “Австралия” — “Ўзбекистон” баҳси бўлиб ўтди.
Учрашувнинг биринчи дақиқасида майдонимизда бўлган саросимада футболчимиз Дилрабо Асадова ўз дарвозасини ишғол қилиб қўйди. Айнан шу голдан сўнг мезбонлар бор кучлари билан олдинга ўтди.
Рақибларимиз вакиласи Мишелл Ҳейман ўз ҳисобига 4 та гол ёздириб қўйди. Бундан ташқари, рақиб аъзолари Торпей, Фаулер ҳамда Форднинг голлари биринчи бўлимнинг йирик 8:0 ҳисобида якунга етишига сабаб бўлди.
Учрашувнинг сўнгги дақиқасидаги Расо ва Саернинг голлари ҳисобни йирик 10:0 ҳолатига келтирди.
Таъкидлаш жоизки, ўзбекистонлик футболчи қизлар ҳисобга эътибор бермай сўнгги дақиқагача бор кучи билан ҳаракат қилди. Тошкентда ўтказилган дастлабки ўйинда ҳам "кенгурулар" 3:0 ҳисобида ғалаба қозонишганди.
Шу тариқа, Австралия аёллар терма жамоаси Париж-2024 олимпиадаси йўлланмасини қўлга киритди. Шунингдек, Япония ҳам Олимпиадада қатнашади.
