"Насаф" - "Олимпик" учрашувидан сўнг (2:0) тошкентликлар устози Тимур Кападзе матбуот анжуманида иштирок этди.

- "Насаф"ни ғалаба билан табриклайман. Ўйин қийин ўтди. Қорли шароит иккала жамоага ҳам ўз ўйинини кўрсатишга ҳалал берди. Жамоамиз анчадан бери ўйин ўтказмагани билиниб қолди. "Насаф" ОЧЛда иккита ўйин ўтказди ва айни пайтда формага тушиб олганлиги кўриниб турибди.

Биз сўнгги ўйинни Туркиядаги йиғинда ўтказгандик. Деярли бир ой бўлди. Келганимиздан сўнг ҳам қорли шароит тўсқинлик қилди. Қор сабабли "Машъал"га қарши ўйинимиз 50 дақиқа бўлганди. Шу сабабли тайёргарлик жараёнида озгина қийинчиликлар бўлди.

Бугунги об-ҳаво ҳам ўз таъсирини ўтказди. Лекин умуман олганда, яхши учрашув бўлди. Энди кейинги ўйинга тайёргарлик кўрамиз. Майдондаги йигитлар бугун ҳаракат қилишди.

- Ҳисобдан қониқдингизми?

- Албатта қониқмадим. Мағлубиятдан хеч ким қониқмайди. Барча ғалаба учун майдонга тушади. Лекин вазиятга реал қарашимиз керак. Гол бўлган вазиятни яна қараб чиқамиз. Қандай хато қилганимизни кўриб, хулоса қиламиз.

- Бугун "Олимпик"да жароҳат сабаб икки марказий ҳимоячи ўйнамади. Уларнинг йўқлиги бугунги мағлубиятга таъсир қилди деб ҳисоблайсизми?

- Йўқотишлар... Нафақат икки ҳимоячи, балки ҳужумчимиз ҳам учрашувда иштирок этмади. Йўқотишлар бор, лекин уларнинг ўрнига майдонга тушган йигитлар ҳам яхши ўйин кўратишди, улар учун ҳам имконият бўлди. Улар бўлганида (марказий ҳимоячилар) албатта яхшироқ бўларди.

- Ўйин суръати юқори бўлмасада, Акбар Абдирасулов қизил карточка олди. Буни нима билан изоҳлаган бўлардингиз? Унда тартиб билан боғлиқ муаммо борми?

- Бу бўлиб турадиган нарса. У позицияни тўғрироқ эгаллаганида бундай ҳолатгача олиб келмасди. Лекин, ҳар икки вазиятда ҳам - бирида қарши ҳужум, иккинчисида бирга-бир вазиятда сариқ карточка олди. Бундай ҳолатларни албатта кўриб чиқамиз.