Греция пойтахтида қиличбозликнинг сабля йўналиши бўйича аёллар ўртасида Жаҳон кубоги босқичи бўлиб ўтмоқда. Унда Зайнаб Дайибекова Ўзбекистон терма жамоаси шарафини ҳимоя қиляпти.
Ҳамюртимиз жаҳон рейтингида кучли 16 таликдан жой олгани учун кечаги саралаш беллашувларини ўтказиб юборди. Бугун у 1/32 финал босқичидан баҳсларга киришади. Унда юртдошимизга жанубий кореялик Хаеун Хонг рақиблик қилади. Дайибекова ушбу рақиб тўсиғидан ўта олса, кейинги даврада Саоссен Будиаф (Жазоир) ҳамда Ирене Веччи (Италия) жуфтлиги ғолибига қарши жанг қилади.
