Ливан футбол ассоцацияси томонидан 24 нафар футболчи келишилган ўйинларда айбланиб, турли муддатларга четлаштирилгани Ливан миллий терма жамоаси бош мураббийи Тео Буккернинг ҳафсаласини пир қилди.

Рамиз Даюб  ("Селангор", Малайзия) бир умрга футболдан четлаштирилган бўлса, яна 2 нафар футболчи 3 йилгача футболдан четда юрадиган бўлди. Германиялик мураббий эса ЖЧ-2014га чиқиб бўлмаслигини таъкидламоқда.

"Бутун мамлакат бошқачароқ қарор қабул қилинишига умид қилганди. Қабул қилинган қарор эса барчасини бузиб юборди", дейди Тео Буккер. "Мен 2-3 кун ичида федерация вакиллари билан учрашаман ва ўз фикримни айтаман. Ҳозирча нима қилишни билмаяпман. Мен директорлар кенгаши ва федерация президенти билан гаплашашим керак. Қалбан синиб қолдим. Мен барчасини ўйлаб кўришим ва тўғри қарор қабул қилишим керак. Бор гап шу".

"Бундан 12 йил аввал Ливанда ишлаганимда ҳам келишилган ўйинлар билан боғлиқ муаммоларбор эди. Шу муаммо туфайли мен мамлакатни тарк этгандим. Орадан 10 йил ўтиб Ливанга қайтсам, ҳамон шу аҳвол", дейди германиялик мутахассис.

Федерация вакиллари футболчиларнинг қарорга нисбатан эътирознома келтиришлари мумкинлигини айтишмоқда. Аммо айрим футболчилар ҳақиқатан ҳам келишилган ўйинларда қатнашганини тан олган.

"Ўзим ишонган бир нечта йигитлар мени ҳайрон қолдиришди. Нима дейишга ҳам ҳайронман. Мен бу мамлакатда кўп ишладим, кўп куч сарфладим, аммо айрим аҳмоқлар барчасини бузиб ташлашди", дейди 64 ёшли Буккер.

Эслатиб ўтамиз, Ўзбекистон ва Ливан миллий терма жамоалари 26 март куни Тошкентдаги "Бунёдкор" стадионида ЖЧ-2014 саралаш баҳсида майдонга тушишади.