Винисиус "Валенсия" стадионида яна ирқчиликка учраган бўлиши мумкин.
Кеча "Реал" "Валенсия" билан дуранг ўйнади - 2:2. Винисиуснинг дубли эвазига 30-дақиқага келиб 0:2 ҳисобида мағлуб бўлаётган мадридликлар ҳисобни тенглаштиришга муваффақ бўлди. Биринчи голдан сўнг бразилиялик қўлини мушт қилиб қўйганини кўрсатди - бу BLM ҳаракатининг имо-ишораси. Иккинчи тўпдан кейин қўлларини қулоқларига қўйди.
Ўйин вақтида ESPN Brazil телеканали трибунада Винисиусни "маймун" деб атаган боланинг видеосини эълон қилди. Видеони суратга олган аёлнинг айтишича, ўйин вақтида стадионга полиция чақирилган. Ла Лига воқеани текширмоқда.
Винисиус "Валенсия" мухлислари томонидан ирқчиликка учраган 2023 йилнинг май ойидан бери биринчи марта "Месталья"да ўйнади. Испания Қироллик футбол федерацияси ҳисоботида айтилишича, ўша пайтда "юзлаб мухлислар" ирқчиликка йўл қўйган.
