"Реал Мадрид" клуби телевидениеси "Валенсия" билан ўйиндаги ҳакамликка муносабат билдирди.
Ла Лиганинг 27-тур учрашувининг 99-дақиқасида бош ҳакам Хесус Хиль Мансано мадридликларнинг учинчи голидан бир неча сония олдин якуний ҳуштаги чалди. Ўйин 2:2 ҳисобида якунланди.
"Реал Мадрид" клуби телевидениеси хабарида вазият "мисли кўрилмаган" деб номланди. Тақдимотчиларнинг фикрича, бу "Ла Лига тақдирини ҳал қилиши мумкин".
"Ўйинга етти дақиқа қўшиб берилди. 90 дақиқа 25 сонияда Хиль Мансано пенальти белгилади. ВАР аралашуви учун икки дақиқа 25 сония керак бўлди. Шу тариқа, ҳуштак 99 дақиқа 25 сонияда янгради.
98 дақиқаю 40 сонияда ғалаба голи мисли кўрилмаган тарзда бекор қилинди", - дейилади "Реал Мадрид" клуби телевидениесидаги баёнотда.
