Профессионал футбол клуби ва футболчи ўртасида тузиладиган меҳнат шартномалари масаласи йилдан-йилдан тартибга солиб келинмоқда. Шунга қарамай, ЎФА тегишли қўмиталарига келиб тушаётган шикоятлар мазмуни баъзи камчиликларни кўрсатиб қўяди.

Аксар ҳолатларда клуб футболчи билан тузилган меҳнат шартномасининг барча нусхасини ўзида сақлашга ҳаракат қилади ва турли баҳоналар билан уни футболчига тақдим этмайди. Ўз ҳуқуқлари ҳимоясини тегишли шахс ёки ташкилотларга тақдим этган футболчилар эса клубдан шартномани 4 нусхада тузишни талаб қилади ва у имзоланган куниёқ унинг бир нусхасини ўзида қолдиради.

Лига Ўзбекистон футболчилари уюшмаси билан кейинги тўрт йилда қатор лойиҳаларни амалга оширди. Бу эса юқоридаги каби ҳолатларни кескин камайтирди. Навбатдаги қадам сифатида Лига клубларга расмий мурожаат билан чиқиб, жорий йилнинг 31 март санасига қадар меҳнат шартномасининг тегишли нусхасини футболчи ва мураббийларга тақдим этиш шартлигини маълум қилди. 1 апрелдан бошлаб мазкур талаб ижросини ўз вақтида бажармаган футбол клуби жаримага тортилиши белгиланди.

Шунингдек, Лига клубларни шартномаларга киритилаётган ўзгаришлар масаласини тартибга солишга чақирди. Аксар ҳолатларда клуб ва футболчи, клуб ёки мураббий шартномага қўшимчалар киритади, бироқ мазкур шартнома 20 кун ичида Лига рўйхатидан ўтказилмайди. Бу каби ҳолат клубга нисбатан санкциялар киритилишига олиб келади. Айни вақтда Суперлига клубини бошқарган раҳбарлардан бири бу каби ишлар ортидан судда жавоб бераётганлигини унутмаслик керак.