"Реал Мадрид" мухлислари "Валенсия" билан ўйиндан сўнг ижтимоий тармоқларда Петер Федерикони ҳақорат қилишди.

Мадрид клуби тарбияланувчиси январь ойидан бери "Валенсия"да ижара асосида ўйнамоқда. Шанба куни "Месталья"да бўлиб ўтган ўйинда (2:2) Петер 73-дақиқада захирадан майдонга тушди.

Marca нашри хабарига кўра, ўйиндан сўнг асли доминиканлик 21 ёшли футболчи ижтимоий тармоқларда "Реал Мадрид" мухлислари томонидан ирқий ҳақоратга учраган - таъкидланишича, мухлислар Петернинг майдондаги хатти-ҳаракатларидан норози бўлишган. Кейинчалик Петер ўз постларига шарҳларни ёпди.

"Валенсия" ярим ҳимоячига нисбатан ирқчилик кўринишларини қоралади. Расмий баёнотда клуб Петерга нисбатан ҳақоратомуз сўзларни қабул қилиб бўлмас деб атади ва шунингдек, камситишларга қарши курашга содиқлигини таъкидлади.