«Локомотив» – «Бухоро» жамоалари учрашувидан сўнг ўтказилган матбуот анжуманида «Локомотив» клуби номидан жамоа бош мураббийи вазифасини бажарувчи Ҳаким Фузайлов иштирок этди ва дастлаб ўйин борасидаги фикрлари билан ўртоқлашди:

— Мавсумнинг очилиш ўйини бўлгани учун учрашув бошида йигитлар бироз асабийлашди. Ўйинда «Бухоро» асосан ҳимоявий ўйин намойиш этишини билардик. Қолаверса, рақиб сафида тезкор футболчилар қарши ҳужумларни ташкил қилиб туришди. Аммо, ўйинда ҳисоб очилгач, ишимиз бироз осонлашди. «Бухоро» жамоаси эса гол ўтказиб юборгач очилишга мажбур бўлди ва ҳужумга ўтди. Бу бизга ҳужумда кўпроқ бўш ҳудудлар пайдо қилди. Футболчилар ўйиндан олдин берилган кўрсатмаларни тўлиқ бажаришга ҳаракат қилишди.

— Бу йил ПФЛ легионерларга нисбатан талабларни оширди. «Локомотив» ўз сафига бир нафар легионер қўшиб олди. Бироқ, бугун у майдонда кўриниш бермади...
— Дарҳақиқат, биз бу йил бир нафар легионерни рўйхатдан ўтказдик. Бунга ПФЛ чиқарган қарор сабаб бўлди. Жамоамиз кўригида бўлган легионерлардан фақат Кусов ПФЛнинг талабларига мос келади. Талабларга мос келмаган легионерлар учун қўшимча пул тўлаш мантиқсизлик. Ундан кўра маҳаллий йигитларни ўйнатишга қарор қилдик. Жамоамиз сафида бир қатор терма жамоа ўйинчилари бор ва уларга ишонаман. Кусовга келсак, у кеча ёшлар лигасида майдонга тушди. Ҳозир футболчи жароҳатдан тикланиб, аста-секин спорт формасини тиклаб бормоқда. Кейинги ўйинларда у асосий таркибда ҳам майдонга тушади, деган умиддаман.

— Жамоангиз ҳозир мавсумга қанчалик шай?
— «Локомотив» ҳозирда мавсумга 75 фоиз тайёр. Тўғри, биз ОЧЛ плей-офф босқичида ўйнадик. Бор эътиборни шу ўйинга қаратиб, ОЧЛга чиқишимиз ҳам мумкин эди. Аммо, ундай қилишни хоҳламадик. Сабаби, мавсум узоқ давом этади. Агар февраль ойида биз йигитларга катта юклама берганимизда, ОЧЛнинг гуруҳ босқичига чиққан тақдиримизда ҳам мавсум ярмига бориб йигитлар чарчаб қолишарди. Март ойида 3та ўйин бўлиб ўтади ва Ўзбекистон терма жамоаси ўйини туфайли қисқа муддатли танаффус юзага келади. Шу вақтда қисқа йиғин ташкил этишни ўйлаяпмиз. Апрель ойи ўрталарида эса йигитлар 100 фоиз тайёр бўлишларини кутяпман.

— Дилшод Раҳматуллаев нега майдонга тушмади?
— Раҳматуллаев бизнинг асосий таркиб футболчиси. Аммо, у бироз шамоллаб қолди. Шу боис бугун майдонга тушмади. Яқин орада у майдонга тушади, деб ўйлайман. Мавсум узун эканини яна қайтармоқчиман. Александр Шадрин эса машғулотда сонидан жароҳат олди. Ёшлар терма жамоасининг йиғинида қатнашиб қайтган Бобур Йўлдошев 40 даража ҳарорат билан келди. Бу икки футболчи икки ҳафта даволанишади. Шундан сўнг умумий гуруҳга қайтишади.